نہ اِس کی گَرد کُھلی اور نہ اِس کا پانی کُھلا
یہ خاکدان ، کڑی دُھوپ کی زبانی کُھلا
ہر اک پڑاٶ کے پہلو میں آگ جلتی رہی
سو روشنی کا بھی کردار داستانی کُھلا
یہ ایک لمحہ جو ہے ہاتھ سے نکلتا ہوا
اس ایک لمحے میں کتنی ہے بیکرانی ، کُھلا
پرندے دُور افق تا افق دکھاٸی پڑے
ڈھلی جو شام تو اک رنگِ جاودانی کُھلا
سمجھ رہے تھے کہ ہم پر کبھی کُھلے گا نہیں
مکانِ خاک میں آ کر وہ لا مکانی کُھلا
نہ جانے کتنے سُخن ہم گِرہ میں باندھے پھرے
پھر ایک حرف کُھلا اور درِ معانی کُھلا
نہ شاخِ گُل ہے ، نہ سایہ کسی شجر کا یہاں
مثالِ ریگِ رواں ، خوابِ خوش گمانی کُھلا
پلٹنا چاہیں تو اطہر پلٹ بھی سکتے نہیں
بہت ہی دیر میں احساسِ راٸگانی کُھلا