بسم اللہ
۔۔۔۔۔۔۔۔
وہ روحِ عالم
کہ جو زمانوں کی ابتدا ہے
کہ جو زمینوں کی ، آسمانوں کی
سب جہانوں کی انتہا ہے
وہ جوہرِ اعتبار، ہستی
جو سب میں شامل بھی ہے مگر
سب سے ماورا ہے
وہ رشتۂ جسم و جاں
خیال و نظر کی بے انت دوریوں پر بھی
جو ترا میرا رابطہ ہے
وہی جو ٹوٹے دلوں کے گنبد میں
حوصلے بانٹتی ندا ہے
تلاش کے بے کنار موسم میں
یاد جس کی
سوال آنکھوں کے طُور تنویرتی ضیاہے
اُسی کی چاہت وفا سفر میں
قدم قدم میری رہنما ہے
جلیل عالی ۔۔۔ بسم اللہ
