خزاں ۔۔۔ منیر نیازی

خزاں

۔۔۔۔۔

ہوا کی آواز

خشک پتوں کی سرسراہٹ سے بھر گئی ہے

روش روش پر فتادہ پھولوں نے

لاکھوں نوحے جگا دیے ہیں

سلیٹی شامیں، بلند پیڑوں پہ غل مچاتے

سیاہ کووں کے قافلوں سے اٹی ہوئی ہیں

ہر ایک جانب خزاں کے قاصد لپک رہے ہیں

ہر ایک جانب خزاں کی آواز گونجتی ہے

ہر ایک بستی کشاکشِ مرگ و زندگی سے نڈھال ہو کر

مسافروں کو پکارتی ہے کہ ۔۔۔ "آئو

مجھ کو، خزاں کے بے مہر، تلخ احساس سے بچائو"

Related posts

Leave a Comment