گنبدِ آب
۔۔۔۔۔۔۔۔
حسرت آیات تلاوت کر کے
میں نے کہسارِ تمنا پہ کمندیں ڈالیں
اور پھر شوقِ تماشا میں کئی
آرزو پوش چٹانیں پھاندیں
کتنی ارمان بھری جھیلوں پر
یاس انگیز پرندے دیکھے
جن کی مغموم صدا کاری سے
کن زمانوں کی حزیں برف کے تودے پگھلے
ایک اندوہ کا شوریدہ سر
مضطرب ہوکے جو دریا بپھرا
چشمِ محزون سے چشمے اُبلے
آن کی آن میں رنجیدہ فلک
ایسا غم ناک گھٹا ٹوپ ہوا
میگھ ملہار سا دل دوز الاپ
روح کے تارِ زیاں چھیڑتا تھا
دلِ بے چین میں روپوش الم
ایک عرصے سے جو صحرائی تھا
گنبدِ آب ہوا جاتا تھا
آپ سے آپ ہوا جاتا تھا
علی اصغر عباس ۔۔۔ گنبدِ آب
