بیاد اسلم کولسری
۔۔۔۔۔۔۔۔۔۔۔۔
اُٹھے گا کس طرح بارِ الم تیری جدائی کا
کہ ہو سکتا نہیں صدمہ رقم تیری جدائی کا
رہیں گی عمر بھر یادیں تری میری معیت میں
کہ تنہا اٹھ نہیں سکتا علَم تیری جدائی کا
ترے اشعار میں اب ڈھونڈتا ہوں تیری صورت کو
کسی صورت تو رہ جائے بھرم تیری جدائی کا
کہاں اب زندگی کی تلخیوں سے جان چھوٹے گی
کہ اب تو عمر بھر پینا ہے سم تیری جدائی کا
مجال اپنی کہاں پرواز کہ اس سے کروں شکوہ
کہ جس نے مجھ پہ توڑا ہے ستم تیری جدائی کا
