حرف و بیان و ذکر، یہ مدحت رسول کی
اللہ کی عطا ہے، عنایت رسول کی
دل میں نہیں جو الفتِ آلِ نبی تو پھر
ہرگز نہ مل سکے گی شفاعت رسول کی
ایثار و آگہی و محبت ، یہ بندگی
بٹتی ہے کائنات میں دولت رسول کی
کُل عالمین کے لئے رحمت لقب ہیں وہ
پیر و جواں کے سر پہ ہے شفقت رسول کی
وسعت جہاں تلک ہے خدا کی خدائی کی
ہر اُس مقام پر ہے حکومت رسول کی
جبریل پَر سمیٹ کے سدرا پہ ہیں کھڑے
جن و ملک ہیں دیکھتے رفعت رسول کی
صادق، امین غیر بھی کہتے ہیں ذوالفقار
دنیا پہ آشکار ہے عظمت رسول کی
