اے دل!
۔۔۔۔۔۔
نظر نظر سے ملا عشق میں فنا ہو جا
مسافرانِ محبت کا رہنما ہو جا
سکوتِ شام و سحر سے کلام کرتے ہوئے
ندائے کن کی حقیقت سے آشنا ہو جا
متاعِ صبر سے دل میں وہ درد پیدا کر
گلوں کا حسن چمن کے لیے صبا ہو جا
نظامِ جبر کے آگے جھکا نہ سر اپنا
صدائے حق و صداقت کا ہم نوا ہو جا
نکل جہاں کے اندھیرے سے روشنی میں آ
کسی نحیف سے دل کی کوئی دعا ہو جا
ترا غرور نہ کر دے کہیں تجھے رسوا
تو بارگاہِ عبادت میں باوفا ہو جا
یہ خواہشات کی دنیا ہے چار دن، اے دل!
بُھلا دے طرزِ کہن اور پارسا ہو جا
