شہرِ نبیؐ ، اے شہرِ ضیافات ، مرحبا!
آقائےؐ دو جہاں کی مدارات ، مرحبا!
پھیلے ہوئے ہیں جابجا دامانِ سائلاں
سرکارؐ کی سخاوت و خیرات ، مرحبا!
صدیوں کی داستان سناتی رہیں مجھے
شہرِ جمال، تیری زیارات ، مرحبا!
بابِ بقیع ، گنبدِ خضرا ، یہ جالیاں
اللہ رے یہ ارفع مقامات ، مرحبا!
کیسے بیاں ہو عالمِ تسکین و جذب و کیف
اس شہرِ آرزو کی عبادات ، مرحبا!
رہ جائے اَن کہی نہ کوئی بھی دمِ وداع
اے ابرِ چشمِ جاں ، تری برسات مرحبا!
ہیں محوِ انتظار ضیّوف النبیؐ ، انیس!
ہر سمت ، پُرشکوہ عمارات ، مرحبا!
