سوچ میں گُم ہوں کہ جب نعتِ پئمبر لکھوں
نور لکھوں کہ انہیں نور کا پیکر لکھوں
آج کل شام و سحر میرا وظیفہ ہے یہی
لکھ کے میں حمدِ خدا، مدحتِ سرور لکھوں
اِس سے بڑھ کر بھی ہے پیرایۂ توصیف بھلا!
کیوں نہ ہر صفحے پہ میں سورۂ کوثر لکھوں
دامنِ رحمتِ عالم ہے دوعالم کو محیط
سائبانِ کرم و شافعِ محشر لکھوں
پرتوِ مہرِ حرا سے جو ضیا گیر ہوئے
اُن رفیقانِ بنی کو مہ و اختر لکھوں
میں کہ ہوں ان کے غلاموں کے غلاموں کا غلام
خود کو کیونکر نہ حریفِ جم و قیصر لکھوں
میرا ایماں، مِری معراجِ سُخن، یزدانیؔ
یہ کہ نعتِ شہِ ابرار برابر لکھوں
