یزدانی جالندھری

جادۂ زیست پہ برپا ہے تماشا کیسا دوست بچھڑا ہے ہر اک گام پہ کیسا کیسا

حریمِ ناز میں کیا بات تھی جو راز رہی وہ حرف کیا تھا جو بارِ دگر کہا نہ گیا

تنہائی میں اکثر یہی محسوس ہوا ہے جس طرح کوئی میری طرف دیکھ رہا ہے

جلوہ افروز ہے کعبہ کے اجالوں کی طرح دل کی تعمیر کہ کل تک تھی شوالوں کی طرح

لبوں تک آیا زباں سے مگر کہا نہ گیا فسانہ درد کا المختصر کہا نہ گیا

وہ بات جس پہ مدار وفا ہے یزدانی وہ بات کہنا پڑے گی حضور یار مجھے

تبصرہ آپ کے اندازِ کرم پر کیا ہو مجھ کو خود اپنی تباہی کا سبب یاد نہیں

دل بھی لوح و قلم کا ہمسر ہے داستانیں ہیں کتنی دل پہ رقم

ٹوٹا نہیں اشکوں سے ابھی ضبط کا پشتہ پانی ابھی خطرے کے نشاں تک نہیں آیا

سن رہے ہیں وہ انہماک کے ساتھ کوئی تو بات واقعات میں ہے