دل میں رہے دروازۂ دربارِ مدینہ
اے نعت گرِ سید و سردارِ مدینہ!
گرمی ہے کچھ ایسی کہ زباں سوکھ رہی ہے
اک بوند، مرے ابرِ گہر بارِ مدینہ!
ہر شہر سے خط آئے مگر میری تمنا
آ جائے کسی روز مجھے تارِ مدینہ*
آشفتہ سروں کےلیے سامانِ تسلی
دیوارِ مدینہ تو ہے دیوارِ مدینہ
اس ارضِ دو عالم کو بہت ناز ہے خود پر
سر پر جو سجائی گئی دستارِ مدینہ
انوارِ مدینہ سے تجھے بھیک عطا ہو
اے دل! اے مرے کاسۂ انوارِ مدینہ!
فائق! مجھے کہتے ہیں سبھی لوگ تُرابی
ہاں دوسرے لفظوں میں نمک خوارِ مدینہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*ترکیب دانستہ تراشی گئی
