نعت رسول پاک صلی اللہ علیہ وسلم ۔۔۔ اسد رضا سحر

تمہارے در پہ جھکی ہے جبینِ حرف وصدا
’’مہ و نجوم سے پُر ہے زمینِ حرف و صدا ‘‘

تری عطا کے سبب لوگ جان لیتے ہیں
کہاں کہاں پہ جڑے ہیں نگینِ حرف و صدا

میں جب سے لوٹ کے آیا ہوں کربلا سے مجھے
بلا رہے ہیں مسلسل مکینِ حرف و صدا

جو لے کے آتا ہے پیغام کبریائی کا
وہ جبرئیل ہے تیرا امینِ حرف و صدا

درود پڑھنے سے مشکل کشائی ہوتی ہے
اسی پہ ہے مرا کامل یقینِ حرف و صدا

ورود تجھ پہ ہوا ہے خدا کے مظہر کا
تْو خوش نصیب ہے کتنی زمینِ حرف و صدا

Related posts

Leave a Comment