امید فاضلی
اک ایسا مرحلۂ رہ گزر بھی آتا ہے
کوئی فصیل انا سے اتر بھی آتا ہے
تری تلاش میں جانے کہاں بھٹک جاؤں
سفر میں دشت بھی آتا ہے گھر بھی آتا ہے
تلاش سائے کی لائی جو دشت سے تو کھلا
عذاب صورتِ دیوار و در بھی آتا ہے
سکوں تو جب ہو کہ میں چھاؤں صحن میں دیکھوں
نظر تو ویسے گلی کا شجر بھی آتا ہے
بدن کی خاک سمیٹے ہوئے ہو کیا لوگو
سفر میں لمحۂ ترکِ سفر بھی آتا ہے
دلوں کو زخم نہ دو حرفِ نا ملائم سے
یہ تیر وہ ہے کہ جو لوٹ کر بھی آتا ہے
میں شہر میں کسے الزامِ ناشناسی دوں
یہ حرف خود مرے کردار پر بھی آتا ہے
نظر یہ کس سے ملی ناگہاں کہ یاد آیا
اسی گلی میں کہیں میرا گھر بھی آتا ہے
ہوا کے رخ پہ نظر طائرانِ خوش پرواز
قفس کا سایہ پسِ بال و پر بھی آتا ہے
میں حرف حرف میں اُترا ہوں روشنی کی طرح
سو کائنات کا چہرہ نظر بھی آتا ہے
لہو سے حرف تراشیں جو میری طرح امید
انھی کے حصہ میں زخمِ ہنر بھی آتا ہے
۔۔۔۔۔۔
جاذب قریشی
خیال بن کے وہ مجھ میں اتر بھی آتا ہے
کہ رفتہ رفتہ دعا میں اثر بھی آتا ہے
جسے تلاش ہے خوش رنگ آبشاروں کی
وہ زخم زخم بدن لے کے گھر بھی آتا ہے
چراغ بن کے چمکتا ہوں سنگریزوں میں
سوادِ شب مجھے ایسا ہنر بھی آتا ہے
نہ جسم و جاں کا اندھیرا نہ راستوں کا غبار
جو تو ملے تو اک ایسا سفر بھی آتا ہے
لہو لہو جو رہا پتھروں کی بارش میں
گلی گلی وہی چہرہ نظر بھی آتا ہے
اسے بھی پیار کے موسم پسند ہیں جاذب
سفر کی دھوپ میں جلنے شجر بھی آتا ہے
۔۔۔۔۔۔۔۔
احتشام بچھرایونی
حرم کی راہ میں ساقی کا گھر بھی آتا ہے
سفر میں لمحۂ تر کِ سفر بھی آتا ہے
تجھے کہ پردہ نشیں یہ ہنر بھی آتا ہے
نظر بھی آتا نہیں اور نظر بھی آتا ہے
دبی دبی سی زباں میں یہ پوچھنا قاصد
کبھی خیال میں آشفتہ سر بھی آتا ہے
تمہاری بات ہے کچھ اور یوں تو آنے کو
غریب خانے پہ اکثر قمر بھی آتا ہے
غموں کی شام ہے بے شک مگر اداس نہ ہو
بشکلِ شام پیامِ سحر بھی آتا ہے
مری تباہی کا باعث مرا نصیب سہی
مگر یہ حرف تری ذات پر بھی آتا ہے
جوابِ خط کی تو امید احتشام کجا
یہ دیکھ لوٹ کے پیغامبر بھی آتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محسن احسان
خلوص ہو تو دعا میں اثر بھی آتا ہے
شجر ہرا ہو تو اس میں ثمر بھی آتا ہے
میری سماعت و بینائی چھیننے والے
میں سن بھی سکتا ہوں مجھ کو نظر بھی آتا ہے
تمھیں چراغ بجھانے کا زعم ہے لیکن
ہمیں طلوعِ سحر کا ہنر بھی آتا ہے
کلیسا و حرم و دیر محترم لیکن
انھی کی زد میں کہیں میرا گھر بھی آتا ہے
فلک نشیں سہی میرا خدا مگر محسن
کبھی کبھی وہ زمیں پر اتر بھی آتا ہے
۔۔۔۔۔۔۔۔۔۔۔
محسن نقوی
ترے بدن سے جو چھو کر ادھر بھی آتا ہے
مثالِ رنگ وہ جھونکا نظر بھی آتا ہے
تمام شب جہاں جلتا ہے اک اداس دیا
ہوا کی راہ میں اک ایسا گھر بھی آتا ہے
وہ مجھ کو ٹوٹ کے چاہے گا چھوڑ جائے گا
مجھے خبر تھی اسے یہ ہنر بھی آتا ہے
اجاڑ بن میں اترتا ہے ایک جگنو بھی
ہوا کے ساتھ کوئی ہم سفر بھی آتا ہے
وفا کی کون سی منزل پہ اس نے چھوڑا تھا
کہ وہ تو یاد ہمیں بھول کر بھی آتا ہے
جہاں لہو کے سمندر کی حد ٹھہرتی ہے
وہیں جزیرۂ لعل و گہر بھی آتا ہے
چلے جو ذکر فرشتوں کی پارسائی کا
تو زیرِ بحث مقامِ بشر بھی آتا ہے
ابھی سناں کو سنبھالے رہیں عدو میرے
کہ ان صفوں میں کہیں میرا سر بھی آتا ہے
کبھی کبھی مجھے ملنے بلندیوں سے کوئی
شعاعِ صبح کی صورت اتر بھی آتا ہے
اسی لیے میں کسی شب نہ سو سکا محسن
وہ ماہتاب کبھی بام پر بھی آتا ہے
