Khalid Ahmad – صفحہ 7

خالد احمد

دیکھا نہ ہمیں توُ نے خط و خال سے آگے اک شہر تھا ، اس شہرِ مہ و سال سے آگے

رنگِ رَم و رفتارِ زمانہ نہیں بھولے دیکھا نہ قدم بھر کے تری چال سے آگے

خالد وہ تھکن تھی کہ تہِ سایۂ مژگاں دیوارِ خمیدہ کی طرح بیٹھ گیا میں

وہ مجھ کو چھو کے گزرتا چلا گیا خالد مہک رہا ہے جو مجھ میں ، کہیں یہ میں تو نہیں

کیا خبر گاؤں کا ہر گھر ترے گھر جیسا ہو یہی باتیں کبھی چوپال میں کر دیکھیں گے

ظاہر نہ کسی کور نظر پر بھی ہُوا میں کیا فرق پڑا ، تجھ پہ کُھلا ، یا، نہ کُھلا میں

کام آئی نہ کوئی آس کہیں کارگر ہو گیا قیاس کہیں

تجھ سے تو اٹھ سکے گا نہ یہ بارِ دوستی مجھ پہ نہ آ پڑے کہیں دیوارِ دوستی

خالد شعورِ شعر کہاں تھا مجھے ، مگر اظہار کی خلش تھی کہ شاعر بنا گئی

مرنے کے بھی ان گنت بہانے جینے کو بھی لاکھ مسئلے ہیں