یاسر رضا آصف ۔۔۔ گرد میں ڈوبا ماضی

گرد میں ڈوبا ماضی
۔۔۔۔۔۔۔۔۔۔۔۔۔۔۔
بے کل من کی اُنگلی پکڑے
اُجڑے گھر میں
جب پہنچا تو میں نے دیکھا
ساری اینٹیں بکھر گئی تھیں
رنگ و روغن ماند پڑے تھے
بنیادیں تک اُکھڑ چکی تھیں
گہری سوچ کی لاٹھی تھامے
میں ماضی میں اتر رہا تھا
لمحہ لمحہ بکھر رہا تھا
میرے سامنے کتنے لمحے آنکھ مچولی کھیل رہے تھے
اک دوجے کے آگے پیچھے
بھاگ رہے تھے
ہر دیوار پہ اُس کے لمس کی تحریریں تک بول رہی تھیں
کانوں میں رس گھول رہی تھیں
میری گال پہ ابّا کا اِک گہرا بوسہ گونج رہا تھا
ماں کی لوری مہک رہی تھی
اتنے میں اِک نازک تتلی
اُڑتے اُڑتے
اُس ملبے پہ آ بیٹھی تھی
سارے منظر بدل گئے تھے

Related posts

Leave a Comment