صَلِّ عَلیٰ مُحَمَّدٍ ۔۔۔۔ مرزا آصف رسول

صَلِّ عَلیٰ مُحَمَّدٍ
۔۔۔۔۔۔۔۔۔۔۔۔۔۔۔۔۔۔

نسخۂ ردِّ ہر بلا صلّ علیٰ محمدٍ
ہے اِسی حرف سے شفا صلّ علیٰ محمدٍ

صَلِّ عَلیٰ نَبِیِّنَامیں کہاں ، کیا مرا درود ؟
یہ تو خدا کی ہے عطا صلّ علیٰ محمدٍ

تھی مری جو بھی ابتدا ، اُس سے مجھے نہیں غرض
ہو مری اس پہ انتہا صلّ علیٰ محمدٍ

دل کا مرض کہ جاں کا ہو ، خوف کسی زیاں کا ہو
پڑھتا رہوں سرِ دوا صلّ علیٰ محمدٍ

کون ہے اکمل البشر ؟ جب لگی ڈھونڈنے نظر
حُسن نے عشق سے کہا: صلّ علیٰ محمدٍ

چھوڑ دے اور سلسلے ، سالکِ حق ! ترے لئے
اُس میں فنا سے ہے بقا صلّ علیٰ محمدٍ

گُل ہیں جہاں کو جو ملے ، اس کی بہار سے کھِلے
رحمت و راحت و رَجا صلّ علیٰ محمدٍ
فرض ہے سب پہ اُس کا حق جس کے خُلُق کا ہر ورق
مِہر و مروّت و وِلا صلّ علیٰ محمدٍ

بھیجے خدا سلام اسے جس کے کرم کے آئینے
عفو و حمایت و سخا صلّ علیٰ محمدٍ

اس پہ فدا ہر آسماں جس کے ُعروج کے نشاں
عظمت و رَفعت و عُلا صلّ علیٰ محمدٍ

اس نے کیا ہے ٹھیک سب ، مانگیں اسی سے بھیک سب
حِلم و حَلاوت و حیا صلّ علیٰ محمدٍ

علم و شعور و آگہی میں ہے جہاں بھی آدمی
سب کا اسی سے ارتقا صلّ علیٰ محمدٍ

سب کی اُسی سے آبرو ، کرتے ہیں جس کی آرزو
حُبّ و اِطاعت و رِضا صلّ علیٰ محمدٍ

عالمِ خلق و امر میں صبحِ ازل سے تا ابد
ہے وہی نور حق نما صلّ علیٰ محمدٍ

وہ جو ہر اک نبی سے تھا عہد لَتُئو مِنُنَّ بِہ
اس میں بھی نکتہ ہے تو کیا ؟ صلّ علیٰ محمدٍ

مفتعلن مفاعلن کی تھی سمائی سر میں دھن

خود کو نہ میں سنا سکا صلّ علیٰ محمدٍ

کیا یہ درود ہے وہی ؟ پڑھتے تھے جس طرح کبھی
صبر و صداقت و صفا صلّ علیٰ محمدٍ

جنگ ہے جیسی کفر سے نعرہ لگائیں کاش پھر
جرأت و غیرت و وفا صلّ علیٰ محمدٍ

اصل درود ہے یہی جاں سے گزر کے دل کہے
کم ہے ابھی جو ہے فدا صلّ علیٰ محمدٍ

لفظ بجا سہی ، مگر پورے وجود سے بشر
کر نہ سکے یہ حق ادا صلّ علیٰ محمدٍ

آصفِ بے نوا ! بنا اشقوں سے کاسۂ درود
ڈال پھر اس میں ہر دعا صلّ علیٰ محمدٍ

Related posts

Leave a Comment