اشرف المخلوق میں جو سب سے اشرف ذات ہے
ذکر اس کا ذکر ہے، اور بات اس کی بات ہے
کل بھی تھا وردِ درودِ پاک ، ہونٹوں پر مرے
آج بھی خیر الوری کی ایک تازہ نعت ہے
ہوں گناہوں پر پشیماں ، رحم یا ربِ رحیم
اشک آنکھوں سے رواں ہیں موسمِ برسات ہے
اک الہ العالمیں ، اک رحمۃ اللعالمیں
اک محمد مصطفی ہیں،اک خدا کی ذات ہے
نعت ہو جائے، تو ہے ان کا کرم ان کی عطا
ورنہ میں کیا ہوں بھلا ، اور کیا مری اوقات ہے
دن تو نکلا آپ کی آمد سے ، ورنہ سچ کہوں
چاند تارے تھے ، پر اکرم رات پھر بھی رات ہے
