یہ خیر خواہیِ اُمت نشانِ رحمت ہے
’’حضورؐ آپ کا اُسوہ جہانِ رحمت ہے‘‘
کھلا ہے بابِ عطا دوست ہو کہ دشمن ہو
یہ شانِ فضل و کرم ہے، یہ شانِ رحمت ہے
وہ آفتابِ قیامت، یہ دھوپ دنیا کی
خوشا کہ سایۂ دامانِ جانِ رحمت ہے
سجھائے حرف بھی مضمون بھی وہی بخشے
یہ نعت گوئی عطائے بیانِ رحمت ہے
خطا کے دشت میں بھٹکے ہوئے مسافر کا
ٹھکانہ ہے تو فقط گلستانِ رحمت ہے
کلامِ پاک ہے سیرت رسولؐ اکرم کی
رسولِ ؐپاک کا فرماں بیانِ رحمت ہے
ہوا ہے حاتمِ طے نامور سخاوت میں
مگر جو فیض رساں خاندانِ رحمت ہے
