شہرِ نبیؐ ہے منبعِ عرفانِ زندگی
ہر پل جہاں پہ جاری ہے فیضانِ زندگی
چاروں طرف ہے جلوئہ انوارِ ایزدی
پیہم ہے ذرّے ذرّے پہ بارانِ زندگی
مجھ بے نوا کو در پہ بلا کر حضورؐ نے
لطف و کرم سے بھر دیا دامانِ زندگی
طیبہ میں آ کے فکر و نظر کو ملی جلا
پورا ہوا جو کب سے تھا ارمانِ زندگی
خوش ہوں کہ دیدِ گنبدِ خضریٰ ہوئی نصیب
کمتر تھا یوں بہت سر و سامانِ زندگی
یثرب میں سانس لیتے ہی درد و الم مٹے
ممکن کہاں کسی سے تھا درمانِ زندگی
موت و حیات کے ہوئے اسرار منکشف
رہتا میں کب تلک بھلا انجانِ زندگی
دل پر فضائے بطحا کا ہے آفریں اثر
ساحل میں ڈھل گیا مرا طوفانِ زندگی
