کیا طرح ہے آشنا گاہے گہے نا آشنا
یا تو بیگانے ہی رہیے ہو جیے یا آشنا
پائمالِ صد جفا ناحق نہ ہو اے عندلیب
سبزۂ بیگانہ بھی تھا اس چمن کا آشنا
کون سے یہ بحرِ خوبی کی پریشاں زلف ہے
آتی ہے آنکھوں میں میرے موجِ دریا آشنا
(ق)
بلبلیں پائیز میں کہتی تھیں ہوتا کاش کے
یک مژہ رنگِ فراری اس چمن کا آشنا
جس کی میں چاہی وساطت اُس نے یہ مجھ سے کہا
ہم تو کہتےگر میاں! ہم سے وہ ہوتا آشنا
داغ ہے تاباں علیہ الرحمہ کا چھاتی پہ میر
ہونجات اس کو بچارا ہم سے بھی تھا آشنا
