رات معزول تھی
۔۔۔۔۔۔۔۔۔۔
شب رسیدہ ستاروں کی مشکیں کسی جا رہی تھیں
چاند پیلا پڑا تھا
کہ دریا اسے بحرِ اسود میں غرقاب کرنے چلا تھا
ایک طوفاں کناروں سے باہر امڈتا
نشیبی علاقوں میں مٹی کے گھر
آبِ زردوز کرنے کو بے تاب تھا
پانیوں کی خلیجیں
ریگِ امکاں پہ بکھری ہوئی زیست کی کرچیاں
چننے والوں کو رنجِ فراواں دیے جا رہی تھیں
حسنِ امروز برگشتہ ایام تھا
زمانے کے ٹب میں گندھا وقت،
جیسے خمیرِ روراں تھا
جسے عرصہ لمحوں کی تاریں بنائے چلا جا رہا تھا
یہ تاریں تھیں یا تازیا نے
جو سانسوں پہ زن زن برستے
مری کھال میں دم کشیدہ
اگن کی لپٹ کو دھواں کر رہے تھے
راکھ ہوتا بدن (جو کہ نردوش تھا)
زینہ زینہ اُترتی خموشی کے قدموں سے لپٹا ہوا
شام کے ساتھ سورج کے در پر کھڑا تھا
کہ معزول شب کی بحالی کے احکام دے
چاند تاروں کی مشکیں کھلیں
اور خوابوں کے آنگن میں رقصاں پری زادیاں
حشر برپا کریں!
علی اصغر عباس ۔۔۔ رات معزول تھی
