سرمست فضائیں ہیں
پیتم پریم بھری
پھاگن کی ہوائیں ہیں
۔۔۔
کچھ کھو کر پائیں ہم
دور کہیں جا کر
اک دنیا بسائیں ہم
۔۔۔
اشکوں میں روانی ہے
آنسو پی پی کر
مدہوش جوانی ہے
۔۔۔۔۔
بھیگی ہوئی راتوں میں
ہم تم کھو جائیں
پھر پریم کی باتوں میں
۔۔۔
کیا اشک ہمارے ہیں
آنسو مت سمجھو
ٹوٹے ہوئے تارے ہیں
۔۔۔۔سہمی ہوئی آہوں نے
سب کچھ کہہ ڈالا
خاموش نگاہوں نے
۔۔۔۔۔
دو نین چھلکتے ہیں
ساجن آ جاؤ
ارمان مچلتے ہیں
۔۔۔۔۔۔۔
یہ طرزِ بیاں سمجھو
کیف میں ڈوبی ہوئی
آنکھوں کی زباں سمجھو
۔۔۔۔۔۔
اک بار تو مل ساجن
آ کر دیکھ ذرا
ٹوٹا ہوا دل ساجن
۔۔۔۔۔۔
کچھ کھو کر پاتے ہیں
یاد میں ساجن کی
یوں جی بہلاتے ہیں
۔۔۔۔۔۔۔
تارے گنواتے ہو
بن کر چاند کبھی
جب سامنے آتے ہو
۔۔۔۔
(محققین کے نزدیک اردو ماہیے کی طرف سب سے پہلے ہمت رائے شرما نے توجہ کی۔ درج بالا ماہیے ان کے لکھے اولین ماہیے شمار ہوتے ہیں جو انھوں نے 1936 میں فلم ’’خاموشی‘‘ کے لیے لکھے۔)
