یہ رہگذارِ گذشتہ بھی اک تحیرّ ہے
زماں دیارِ گذشتہ بھی اک تحیرّ ہے
طلوعِ فردا کی ترقیمِ آفرینش میں
ظہورِ کارِ گذشتہ بھی اک تحیرّ ہے
حیات و موت کا یہ فلسفہ سمجھنے کو
صلیبِ دارِ گذشتہ بھی اک تحیرّ ہے
جو باغبانِ ازل کا ہے بوستانِ ابد
یہاں بہارِ گذشتہ بھی اک تحیرّ ہے
میں روبروےزمانہ ہوا تو جان لیا
کہ شاہکارِ گذشتہ بھی اک تحیرّ ہے
میں انحراف سے نکلا ثبات یافتہ ہوں
سو اعتبارِ گذشتہ بھی اک تحیرّ ہے
منادی عرصۂ آیندہ نے یہ حال میں کی
کہ در کنارِ گذشتہ بھی اک تحیرّ ہے
وقوع پذیر ہوا حادثۂ رفت سے آج
یہ کاروبارِ گذشتہ بھی اک تحیرّ ہے
مسافرانِ تغیر نے اوج دیکھ لیا
کھلا فشارِ گذشتہ بھی اک تحیرّ ہے
نکل کے بھاگ لیا میں حصارِ امکاں سے
مرا فرارِ گذشتہ بھی اک تحیرّ ہے
ازل کے پیڑ سے قرنوں کے پات جھڑتے ہیں
صدی نگارِ گذشتہ بھی اک تحیرّ ہے
بھڑک رہی ہے جو اندر ہزار صدیوں سے
شرارِ نارِ گذشتہ بھی اک تحیرّ ہے
شگاف ڈال کے گذرا ہوں آبِ دریا میں
فسوں شعارِ گذشتہ بھی اک تحیرّ ہے
یہ اشک آنکھ میں حیرت چبھونے آئے ہیں
کہ یادگارِ گذشتہ بھی اک تحیرّ ہے
جو ہولے ہولے یہ زندہ نگل رہا ہے مجھے
سیاہ مارِ گذشتہ بھی اک تحیرّ ہے
گذار آیا ہوں جو عمرِ مختصر اصغر
یہ اختصارِ گذشتہ بھی اک تحیرّ ہے
