محمد ارشاد ۔۔۔ ہر چند ظفر کا ہے وسیلہ تو سفر بھی

ہر چند ظفر کا ہے وسیلہ تو سفر بھی
رہ بھول گئے گھر کی رہا یاد نہ گھر بھی

جس پُل سے گزرنا ہے وہ تلوار کی ہے دھار
یکساں ہیں چپ و راست اِدھر اور اِدھر بھی

احوال سنائیں کسے کیا آب و ہوا کے
ٹِک پائے بگولے نہ ٹھہر پائے بھنور بھی

یہ دفن بگولے میں تو وہ غرق بھنور میں
ہے خشک جو دامن تو بھی کیا ، کیا ہے جو تر بھی

نایاب نہیں عدل و مساوات جہاں میں
جتنی ہے دُمِ فیل ہے اتنی دمِ خر بھی

شے کوئی بھی خالص نہیں دنیاے دَنی میں
ہے شر میں اگر خیر تو ہے خیر میں شر بھی

ایسا نہیں دن کوئی جو گزرا نہ ہو بے شام
ایسی نہیں شب کوئی نہ ہو جس کی سحر بھی

اس حال میں کہنا ہے نہ کہنے کے برابر
جب بات میں بعد از اگر آ جائے مگر بھی

ہے اس میں کسی دیکھنے والے کی خطا کیا
لگ جاتی ہے بندے کو خود اپنی ہی نظر بھی

جو قتل نہ ہو میرے قبیلے* سے نہیں وہ
ہے روشنیِ طبع بلا بسکہ ہنر بھی

سر تن سے جدا چاہیے؟ یا قصد ہے سولی
گردن ہی نہیں دوش پہ گردن پہ ہے سر بھی

ہے عدل پری اہل ہے شہزادہ ہی یا دیو
زاری ہے عبث ، زور بھی درکار ہے زر بھی

چَھن پائے نہ مٹی مری ، چھن پائے تو شاید
مل جائے کسی چھاننے والے کو گہر بھی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گریز د از صفِ ماہر کہ مردِ غوغا نیست

کسے کہ کشتہ نہ شد از قبیلۂ ما نیست

(نظیری)

Related posts

Leave a Comment