نعت رسول مقبول صلی اللہ علیہ وسلم ۔۔۔ ذوالفقار نقوی

صلّوا کی صاد میں نہاں فرمانِ   نعت ہے
صلِ علی کے ورد میں اعلانِ نعت ہے

اس کِشتِ لالہ زار میں مصروف ہیں مَلک
ہر ذی شعور دیکھئے دہقانِ نعت ہے

مہکے ہوئے ہیں ذرّے رَفَعنا کے ذکر سے
زِ ارض تا ثریا خیابانِ نعت ہے

ہے نورِ مصطفیٰ سے زمانے میں روشنی
سب کائنات شمعِ شبستانِ نعت ہے

محشر میں ہو گی پرسشِ اعمال جس گھڑی
کہہ دوں گا میرے پاس یہ دیوانِ نعت ہے

کر کے وضو درود سے، فکریں سنوار کر
لفظیں سجا رہا ہوں کہ میدانِ نعت ہے

والنجم و ھل اَتی سے مودّت کے باب تک 
قرآن حرف حرف دبستانِ نعت ہے

صبح و مسا نہ کیوں رہوں سجدے میں ذوالفقار
ہر آن میری فکر پہ بارانِ نعت ہے

Related posts

Leave a Comment