2019 دسمبر – صفحہ 5

خالد احمد

تختِ مرمر پہ کل تھے آسودہ مرمر آسودگان، زیرِ مزار

اک مذلّت نشیں تھے ہم ہی یہاں کوئی خاقان تھا، کوئی قاچار

کچھ چھپایا نہ ہم نے دُنیا سے عشق ہم نے کیا بھرے بازار

کون گنتا جوان لاشوں کو کون رکھتا دِلاوروں کا شمار

دیکھتا کون ایک پل رُک کر رقصِ یارانِ بے سر و دستار

اِک نم آہنگ حزنیہ لَے پر کیسے تھم تھم کے چل رہے تھے یار

ہر سخن تھا ہم اہلِ غم کے لیے دل شکن، دل خراش، دل آزار

جتنی بار اُس طرف نگاہ اُٹھی روح تک ہم لرز گئے ہر بار

راکھ کب تک کریدتے دل کی ڈال کر سر پہ ہو گئے تیار

جرسِ گُل سنائی دی نہ ہمیں کر گیا کوچ کاروانِ بہار