2020 جنوری – صفحہ 16

خورشید رضوی

دل میں یوں اُترا کسی کی ساعدِ سیمیں کا دھیان شاخِ گُل جس طرح دیوارِ قفس سے آ لگے

رمز یہ کُھل جائے تو دنیا میں دل پھر کیا لگے پاس سے دیکھیں تو مٹی، دور سے دریا لگے

ذرا میں زخم لگائے، ذرا میں دے مرہم بڑے عجیب روابط مرے صبا سے ہیں

یہ جام و بادہ و مینا تو سب دلاسے ہیں لبوں کو دیکھ، وہی عمر بھر کے پیاسے ہیں

حادثہ یہ ہے کہ ساری ذلّتوں کے باوجود رفتہ رفتہ زخم سوئے اندمال آ جائے گا

جانے کس دن ہاتھ سے رکھ دوں گا دنیا کی زمام جانے کس دن ترکِ دنیا کا خیال آ جائے گا

دوستو! میری طبیعت کا بھروسہ کچھ نہیں ہنستے ہنستے آنکھ میں رنگِ ملال آ جائے گا

ریت پر صورت گری کرتی ہے کیا بادِ جنوب کوئی دم میں موجۂ بادِ شمال آ جائے گا

یا شکن آلود ہو جائے گی منظر کی جبیں یا ہماری آنکھ کے شیشے میں بال آ جائے گا

گو نظر اکثر وہ حسنِ لازوال آ جائے گا راہ میں لیکن سرابِ ماہ و سال آ جائے گا