خالد احمد

کون گنتا جوان لاشوں کو کون رکھتا دِلاوروں کا شمار

دیکھتا کون ایک پل رُک کر رقصِ یارانِ بے سر و دستار

اِک نم آہنگ حزنیہ لَے پر کیسے تھم تھم کے چل رہے تھے یار

ہر سخن تھا ہم اہلِ غم کے لیے دل شکن، دل خراش، دل آزار

جتنی بار اُس طرف نگاہ اُٹھی روح تک ہم لرز گئے ہر بار

راکھ کب تک کریدتے دل کی ڈال کر سر پہ ہو گئے تیار

جرسِ گُل سنائی دی نہ ہمیں کر گیا کوچ کاروانِ بہار

کس لیے ارد گرد کھینچ لیے دائرہ دائرہ دَر و دیوار

ربِّ گل! ربِّ رنگ! ربِّ بہار! ایک نقش اور، ربِّ نقش و نگار!

ذکر ہر گام گھنی چھائوں بچھے جانے کا کبھی مجھ برگِ سرِ راہ گزر سے سنیے