پہلا باقاعدہ اجلاس
(12 فروری 2022)
حلقہ اربابِ خیال کاپہلاباقاعدہ اجلاس 12 فروری 2022شام سات بجے 252۔ 
جینیپر بلاک، بحریہ ٹاؤن ،لاہور میں منعقد ہوا۔ اجلاس کی صدارت معروف شاعر ڈاکٹر اختر شمار نے کی۔ نشست کا آغاز تلاوتِ کلام پاک سے ہوا۔ صدرِ محفل جناب اختر شمار نے نعت رسول پاک صلی اللہ علیہ و آلہ وسلم پیش کی۔
جنرل سیکرٹری نوید صادق نے مہمانوں کی حلقہ کے اجلاس میں شرکت پر ان کا شکریہ ادا کیا اور حلقہ کے قیام کے اغراض و مقاصد پر روشنی ڈالی۔ ڈاکٹر یونس خیال اور ڈاکٹر اختر شمار نے آئندہ کے لائحہ عمل کے بارے میں تفصیلی گفتگو کی۔ اور حلقہ کے قیام کو سراہتے ہوئے شعر و ادب کی ترویج کے لیے حاضرینِ محفل سے تجاویز کی درخواست کی۔ اس کے بعد ایک بھرپور شعری نشست ہوئی۔ انتخابِ کلام ملاحظہ فرمائیے:
دیکھی تھی میں نے دشت میں اک خستہ حال قبر
جس پر لکھا تھا: ہجر کا خانہ خراب ہو
(ڈاکٹراختر شمار)
اپنے چکر میں پڑا ہوں اس طرح
جس طرح پرکار کا اندھا سفر
(ڈاکٹریونس خیال)
کوئی دیمک سی رگوں میں ہے رواں سرخ و سفید
کیا کہوں، کتنی اذیت سے لہو بنتا ہے
(سجاد بلوچ)
اٹھائے پھرتا ہوں سر پر سدا دَر و دیوار
اگرچہ ساتھ مرے گھر کہیں نہیں جاتا
(نعمان منظور)
کوشش ہوتی ہے ترتیب نہ زائل ہو
جب بھی کوئی چیز اٹھا کر رکھتا ہوں
(ڈاکٹر فخر عباس)
بجھ کر جلا چراغ تو منظر وہی رہا
اک شخص بھی گیا نہ اجازت کے باوجود
(اکمل حنیف)
بس ایک لمحے میں دل کی قیمت نکال دی تھی، مثال دی تھی
کہ خاک لے کر ہوا میں اس نے اچھال دی تھی، مثال دی تھی
(عاطف جاوید عاطف)
کچھ، کمرہ دھوئیں سے بھر گیا تھا
کچھ شعر، اِدھر اُدھر پڑے تھے
(نوید صادق)
