اے یوسف ِ گم گشتہ
۔۔۔۔۔۔۔۔۔۔
کیا علم کہاں ہے تو اے یوسفِ گم گشتہ
ہو شاد جہاں ہے تو اے یوسفِ گم گشتہ
سکھ میں ہے کہ دُکھ میں ہے معلوم نہیں ہم کو
مدت سے نہاں ہے تو اے یوسفِ گم گشتہ
مشکل ہے بہت مشکل جینا تیری دوری میں
سرمایہِ جاں ہے تو اے یوسفِ گم گشتہ
ہر چند ہوا غائب یعقوب کی نظروں سے
پر دل پر عیاں ہے تو اے یوسفِ گم گشتہ
گرگوں سے فزوں نکلے تیرے لیے بھائی بھی
بے امن و اماں ہے تو اے یوسفِ گم گشتہ
کچھ سہل نہیں بچنا ان بردہ فروشوں سے
قیمت میں گراں ہے تو اے یوسفِ گم گشتہ
اپنوں نے دیا تجھ کو غم چاہ نشینی کا
افسوس وہاں ہے تو اے یوسفِ گم گشتہ
تیرے لیے دنیا ہے ایوانِ زلیخا سی
پاکیزہ جواں ہے تو اے یوسف گم گشتہ
قصہ ہے عجب تیرا زندان سے شاہی تک
عبرت کا نشاں ہے تو اے یوسف گم گشتہ
گلزار تجھے بھولے کیسے کہ لہو بن کر
رگ رگ میں رواں ہے تو اے یوسفِ گم گشتہ
