اندمال
۔۔۔۔۔
دور تک تاریخ کے معدوم ہوتے راستوں پر
اپنی ہمراہی میں چلتا جا رہا ہوں
اک رو پہلی دھوپ کے روشن جزیروں میں
چمکتی ساعتیں
اک ایک کرکے ناگہانی کے
فسوں زاروں میں جاکر کھو گئیں
گم شدہ تاریخ کے اسرار میں گُم جنگلوں میں
چاندنی بن کر اتر جانے کے بعد
کب سمٹتا ہے کوئی چاروں دشاؤں میں
بکھر جانے کے بعد
گیروی پوشاک پہنے چند بھکشو بستیوں کی سمت
نکلے جس گھڑی
دانہ چگتے کچھ پرندے اڑ گئے آہٹ کے ساتھ
آسمانی ساگروں میں ہے بلا کا اضطراب
بھیگتی شاموں کی رہ داری پہ اترا
سرد مہری کا عذاب
موسمِ گل میں بھی وحیِ سبز کی ہیں منتظر
شاخیں شجر کی
صحنِ دل میں خشک پتے رات بھر گرتے رہے
اک پرندہ لوٹ کر آیا نہیں
روح کے اندر کہیں اِک ہجر کی ٹکسال میں
ڈھالی ہوئی میخیں۔۔۔
کسی بے درد لمحے سے مزین
آہنی میخیں گڑی ہیں
اک پرانا گیت بننے کے لیے رنگیں صداؤں
کا کلاوا ڈھونڈ کر لانا پڑا
اپنے ماضی میں کہیں پیچھے بہت پیچھے
ازل گاہوںمیں
حرفِ کن سے پہلے کے زمانوں میں
کہیں جانا پڑا
گیت بنتے ہاتھ کھڈی پر لرزتے ہی رہے
ناتمامی کی ردا اوڑھے ہُوئے گیت اپنے
ہونے کے زمانوں کو ترستے ہی رہے
اَدھ جلے کاغذ پہ اک دوشیزہ کی تصویر، بجلی کی
چمک میں کھکھلا کر ہنس پڑی
اک گراموفون پر بجتی ہُوئی دُھن
اک پرانی دُھن۔۔۔
اساطیری زمانوں کی خموشی میں نہاں
اشلوک کو ڈی کوڈ کرنا چاہتی ہے
زخم جو دل کو ملے ہیں ان کو بھرنا چاہتی ہے
اندمال ۔۔۔۔ عطا ءالرحمٰن قاضی
