میرا اعزاز و اِفتخار دُرود
میرے سرکارؐ! بے شمار دُرود
اسمِ احمدؐ! ہزار جاں قُرباں
جسمِ احمدؐ! ہزار بار دُرود
صحنِ جاں میں گُلاب کیوں نہ کِھلیں
پڑھ رہی ہے یہاں بہار دُرود
اس لیے سر جھکائے رکھتا ہوں
بن گیا ہے گلے کا ہار دُرود
آلِ اطہر پہ بے حِساب سلام
ذاتِ اَقدسؐ پہ صد ہزار دُرود
خون میں، روح میں ہے تابندہ
وجہِ تسکینِ دِل ، قرار ، دُرود
نعت لکھتے ہیں عشق سے عُشّاق
دل سے پڑھتے ہیں جاں نِثار دُرود
کوئی پوچھے دَوائے دِل تابش
اس سے کہنا کہ بار بار ، درود
