تابِ سخن تمام
۔۔۔۔۔۔۔۔۔۔۔۔۔۔۔
کس رُخ کروں قصیدۂ شاہِ زَمن تمام
تشیب ہی میں ہو گئی تابِ سخن تمام
اے کاروانِ خاک و خل و خار و خس! سنبھل
محمل کے ساتھ ساتھ ہیں گُل پیرہن تمام
گُل کِھل رہے ہیں کھلتے سُروں کی اٹھان سے
نقشِ قدم ہیں یاسمن و نسترن تمام
آئینۂ نگاہ میں اُترا وہ آئنہ
آئینہ لاخ ہو گئے رُوئینہ تن تمام
ہر لفظ چاہتا ہے کہ اُس ذکر میں ڈھلے
دَر پر ہیں دست بستہ بتانِ سخن تمام
مدّاح کارِ مدح سے غافل نہیں ہوئے
تارِ نفس کے ساتھ رہے تار زَن تمام
چہرے پہ سایہ گر عجب اَبرِ جمیل ہے
باغِ جناں ہے پَرتوِ رُخ سے بدن تمام
بیٹھے ہیں اُن کے دَر سے لگے سر دَر آستیں
دیدہ درا تمام، دریدہ دہن تمام
سوئے چراغ ، تاب و تبِ مہر کھا گئی
لب گنگ اِک سخن میں ہوئے اہل ِ فن تمام
لکھتے ہی اُن ؐ کا اِسم مُبیںؐ جھلملا اُٹھیں
عرش وَرق پہ کاہ کشانِ سخن تمام
پا آبلہ نے اُٹھ کے خس و خار چن لیے
رَہ دیکھتے ہی رہ گئے سرو و سمن تمام
اِک اِک سہیل رُو خمِ کاکل میں جا چھپا
دیکھا انھیں تو بجھ رہے پروین تن تمام
مٹی سے مس ہوئی وہ سرانگشتِ آفتاب
یک سر گلاب رُو ہوئے نسرین تن تمام
پامال سربلند ہوئے، صف بہ صف اُٹھے
دیکھا وہ رنگِ رُخ تو کھل اُٹّھے چمن تمام
اے زورِ نطق! محض سخن ہیں یہ فلسفی
کشتِ عمل ژفیدہ تھے اُنؐ کے سخن تمام
منہ دیکھتے ہی رہ گئے جادو بیاں سبھی
لب گنگ ہو کے رہ گئے معجز سخن تمام
وہ ریگِ پا نہیں تھی ، ستاروں کا چھان تھا
قرآن پر گواہ تھا اُن کا چلن تمام
گُل بن دیارِ علم کے پیروں کی گرد تھے
اک رنگ میں چنار ہوئے خاربن تمام
اے زیبِ زینِ توسنِ زرّیں زمام! رُک
گھبرا کے چھپ نہ جائیں ستارہ سخن تمام
کس رُخ کروں قصیدۂ شاہِ زَمن تمام
تشیب ہی میں ہو گئی تابِ سخن تمام
