اک بارگہِ حسن میں پیغامِ سناں ہے
گل رنگ ابھی سینۂ شبانِ جناں ہے
اک لشکرِ عصیاں میں گھرا شاہِ جہاں ہے
اک نار مولد جو سدا در پئے جاں ہے
اک شخص جو مجموعہِ اوصافِ نبی ہے
اک پھول ہے جس پھول میں گلزار نہاں ہے
آئے ہیں عجب شان سے میدانِ وغا میں
مولا ہیں کہ گلزار میں اک سروِ رواں ہے
معصوم سی اک پیاس کا ہنسنا سر میداں
کیا تیر ہے جس تیر پہ قرباں کماں ہے
دشمن کی قطاروں میں ہیں عباس غضب ناک
شمشیر سرِ دشتِ وغا شعلہ فشاں ہے
لگتا ہے جہان نعرۂ مظلوم حسینا
سمجھو کہ یہ آنکھوں کے لیے وقتِ اذاں ہے
ق
اک لشکرِ عصیاں میں گھرے فخرِ ملائک
کہتے ہیں کہ شاگردِ علمدار کہاں ہے
اک دشت میں تا دیر ضعیفی نے پکارا
ہم شکلِ پیمبر مرے خورشید کہاں ہے
کس دستِ شقی نے تجھے نیزے میں پرویا
مظلومِ جہاں مرکزِ اندوہِ گراں ہے
دیکھا نہیں دنیا نے شہِ عرش مزاجاں
کن تپتی زمینوں پہ کھڑا گریہ کناں ہے
کچھ آس مدینے کو پلٹنے کی ہے باقی
بجھتی ہوئی آنکھوں سے ضیا بار عیاں ہے
