خالد احمد

پہلے سے دوست ہیں نہ وہ پہلے سی دوستی کس سے کہیں کہ شہر میں کیا کیا نہیں رہا

بے چین شام سے ہیں اَبابیل کی طرح کعبے کے رُخ اڑان کا یارا نہیں رہا

تختِ مرمر پہ کل تھے آسودہ مرمر آسودگان، زیرِ مزار

اک مذلّت نشیں تھے ہم ہی یہاں کوئی خاقان تھا، کوئی قاچار

کون گنتا جوان لاشوں کو کون رکھتا دِلاوروں کا شمار

دیکھتا کون ایک پل رُک کر رقصِ یارانِ بے سر و دستار

اِک نم آہنگ حزنیہ لَے پر کیسے تھم تھم کے چل رہے تھے یار

ہر سخن تھا ہم اہلِ غم کے لیے دل شکن، دل خراش، دل آزار

جتنی بار اُس طرف نگاہ اُٹھی روح تک ہم لرز گئے ہر بار

راکھ کب تک کریدتے دل کی ڈال کر سر پہ ہو گئے تیار