چاند چہرہ، ستارہ آنکھيں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ميرے خدايا! ميں زندگی کے عذاب لکھوں کہ خواب لکھوں
يہ ميرا چہرہ، يہ ميری آنکھيں
بُجھے ہوئے سے چراغ جيسے
جو پھر سے جلنے کے منتظر ہوں
وہ چاند چہرہ، ستارہ آنکھيں
وہ مہرباں سايہ دار زلفيں
جنہوں نے پيماں کيے تھے مجھ سے
رفاقتوں کے، محبتوں کے
کہا تھا مجھ سے کہ اے مسافر رہِ وفا کے
جہاں بھی جائے گا ہم بھی آئيں گے ساتھ تيرے
بنيں گے راتوں ميں چاندنی ہم تو دن ميں سائے بکھير ديں گے
وہ چاند چہرہ، ستارہ آنکھيں
وہ مہرباں سايہ دار زلفيں
وہ اپنے پيماں رفاقتوں کے، محبتوں کے
شکست کرکے
نہ جانے اب کس کی رہ گزر کا منارہء روشنی ہوئے ہيں
مگر مسافر کو کيا خبر ہے
وہ چاند چہرہ تو بجھ گيا ہے
ستارہ آنکھيں تو سو گئی ہيں
وہ زلفيں بے سايہ ہو گئی ہيں
وہ روشنی اور وہ سائے مری عطا تھے
سو میری راہوں ميں آج بھی ہيں
کہ ميں مسافر رہِ وفا کا
وہ چاند چہرہ، ستارہ آنکھيں
وہ مہرباں سايہ دار زلفيں
ہزاروں چہروں، ہزاروں آنکھوں،
ہزاروں زلفوں کا ايک سيلابِ تند لے کر
مرے تعاقب ميں آرہے ہيں
ہر ايک چہرہ ہے چاند چہرہ
ہيں ساری آنکھيں ستارہ آنکھيں
تمام ہيں
مہرباں سايہ دار زلفيں
ميں کس کو چاہوں، ميں کس کو چُوموں
ميں کس کے سائے ميں بيٹھ جاؤں
بچوں کہ طوفاں ميں ڈوب جاؤں
نہ ميرا چہرہ، نہ ميری آنکھيں
مرے خدايا! ميں زندگی کے عذاب لکھوں کہ خواب لکھوں
