بیت بازی – صفحہ 23

ابراہیم اشک

تھی حوصلے کی بات زمانے میں زندگی قدموں کا فاصلہ بھی یہاں ایک جست تھا

خود اپنے آپ سے لینا تھا انتقام مجھے میں اپنے ہاتھ کے پتھر سے سنگسار ہوا

مجھے نہ دیکھو مرے جسم کا دھواں دیکھو جلا ہے کیسے یہ آباد سا مکاں دیکھو

وہ عالم ہے کہ منہ پھیرے ہوۓ عالم نکلتا ہے شبِ فرقت کے غم جھیلے ہوؤں کا دم نکلتا ہے

جو مزے آج ترے غم کے عذابوں میں ملے ایسی لذت کہاں ساقی کی شرابوں میں ملے

نہ چاند نے کیا روشن مجھے نہ سورج نے تو میں جہاں میں منور ہوا تو کیسے ہوا

تا کہ گزرے ہوئے خواب کی باس کمرے میں ٹھہری رہے میں نے سانسوں کو مدھم رکھا اور گھر کو قفس کر لیا

میں سچ تو بولتا ہوں مگر اے خدائے حرف تو جس میں سوچتا ہے مجھے وہ زبان دے

وہ بات جس پہ مدار وفا ہے یزدانی وہ بات کہنا پڑے گی حضور یار مجھے

گیسو و رخسار کی باتیں کریں آؤ مل کر پیار کی باتیں کریں