لطیف ساحل

سرِ شاخِ سبز گلاب ہے کہ ہے آئینہ ترا روپ ہے کوئی خواب ہے کہ ہے آئینہ مجھے پھر سے اپنی تلاش ہے ترے روبرو تجھے کیا خبر یہ شباب ہے کہ ہے آئینہ

ٹکرائیے ہجوم سے اور جان جائیے دیوار کون کون ہے، رستہ ہے کون کون

صہیب اکرام

بس یونہی اک دن ہوا کے ساتھ چل نکلے صہیب رہ گیا اسباب سب دہلیز پر رکھا ہوا

ہم فلک زاد بھی ان سبز زمینوں پہ صہیب ایسے اترے ہیں کہ پھر نقل مکانی سے گئے

یہ نقدِ جاں ہے اسے سُود پر نہیں دیتے جسے طلب ہو ، وہ ہم سے مضاربہ کر لے

کاٹ کر دینا پڑا ہاتھ بھی زنجیر کے ساتھ قید سے ورنہ رہائی نہیں دیتا تھا جہاں

ہم نے اک درجۂ حیرت میں تجھے پایا تھا اور اک درجۂ حیرت میں گنوا بیٹھے ہیں

ایک بازار حسینوں کا لگا رہتا تھا ہائے وہ دور کہ گاہک تھا زمانہ دل کا

نہ جانے پچھلے جنم کون سی خطا ہوئی تھی کہ اس جنم میں مجھے آدمی بنایا گیا

عشق نے خاص کردیا ہے ہمیں حاشیے سے پرے چلے گئے ہم