حُسن
۔۔۔۔۔
یہ کائنات، مرا اِک تبسمِ رنگیں
بہارِ خُلد، ۔۔۔ مری اِک نگاہِ فردوسیں
ہیں جلوہ خیز زمین و زماں مرے دم سے
ہے نور ریز فضائے جہاں مرے دم سے
گھٹا ؟ نہیں ۔۔۔ یہ مرے گیسوؤں کا پرتَو ہے
ہوا ؟ نہیں ۔۔۔ مرے جذبات کی تگ و دَو ہے
جمالِ گل؟ نہیں ۔۔۔ بے وجہ ہنس پڑا ہوں مَیں
نسیم صبح ؟ نہیں ۔۔۔ سانس لے رہا ہوں مَیں!!
یہ زندگی تو ہے اک جذبِ والہانہ مرا
یہ عشق تو ہے اِک احساسِ بیخودانہ مرا
ظہورِ کون و مکاں کا سبب، فقط مَیں ہوں
نظامِ سلسلہء روز و شب، فقط مَیں ہوں
۔۔۔۔۔۔۔۔۔۔۔۔۔۔۔۔۔۔۔
مجموعہ کلام : شبِ رفتہ
مطبوعہ: ۱۹۵۸ء
نیا ادارہ ، لاہور
