چھپا کے شب سے جو شمس و قمر بناتے ہیں
دکھائی دیتے نہیں ہیں مگر بناتے ہیں
حروفِ سبز میں ڈوبے ہوئے قلم لے کر
ہم اپنے دستِ ہنر سے شجر بناتے ہیں
ستارا وار چنی ہے کرن کرن ہم نے
اور اپنے حسنِ نظر سے سحر بناتے ہی
ترا وجود غنیمت ہے اے سیاہئ شب
ہم اپنی اپنی ضرورت کے ڈر بناتے ہیں
کنارا ہاتھ سے چھوڑا نہیں ابھی ہم نے
خیال و خواب میں ہر سو بھنور بناتے ہیں
رواج ہے کہ جو خود با خبر نہیں ہوتے
کسی کی بے خبری کو خبر بناتے ہیں
ورق ورق پہ لکھے بے جہت اشاروں کو
سب اپنے اپنے لئے خیر و شر بناتے ہیں
وہ ایک قطرہ نم، ہم صدف مثال جسے
کنارِ چشم سے چن کر گہر بناتے ہیں
نہ جانے کون مسافر ہے کون سی منزل
ستارے جھوم کے گردِ سفر بناتے ہیں
عجیب لوگ ہیں دریا کے راستے میں کنور
کس اہتمام سے دیوار و دَر بناتے ہیں