نظرنظر تِری حسرت ہے دل بہ دل ترا غم
ملا ہے اہلِ زمانہ کو مستقل ترا غم
گزر چُکی ہے خزاں عشرتِ تمنا کی
کھلا ہُوا ہے سرِ گلستانِ دل ترا غم
بسی ہوئی ہے فضاؤں میں بس تری خُوشبو
ر چا ہوا ہے مناظر میں مستقل ترا غم
ہر ایک رنج میں تیرے گمان کی آمیخت
خوشی کےسارے علاقوں سے متصل ترا غم
دلوں کو درد کی دولت سے بہرہ مند کرے
ہے اپنی اصل میں اک گُونہ معتدل ترا غم
ہر ایک آنکھ ، ہر اک آئنے کا خواب ہُوا
جمالِ حیرت و حسر ت پہ مشتمل ترا غم