ریاض خیر آبادی ۔۔۔۔ ہنگامِ نزع گریہ یہاں بے کسی کا تھا

ہنگامِ نزع گریہ یہاں بے کسی کا تھا
تم ہنس پڑے یہ کون سا موقع ہنسی کا تھا

اٹھے نہ میری گور سے دشمن بھی بیٹھ کر

کیا عالم آج ہائے! مری بے کسی کا تھا

دل نے مجھے خراب کیا کوئے یار میں
دشمن پہ اعتبار مجھے دوستی کا تھا

دُکھ جائے گا دل اس لیے جاری ہوئے نہ اشک
دیکھو تو پاس، نزع میں کتنا کسی کا تھا

جس انجمن میں بیٹھ گیا، رونق آ گئی
کچھ آدمی ریاض عجب دل لگی کا تھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجموعہ کلام: کلامِ ریاض

مرتبہ: انور کمال حسینی

اسٹار پبلی کیشنز دلی

 

Related posts

Leave a Comment