۔۔۔۔ تمھارے حُسن کے نام
۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام لکھتا ہے شاعر تمہارے حُسن کے نام
بکھر گیا جو کبھی رنگِ پیرہن سرِ بام
نکھر گئی ہے کبھی صبح، دوپہر ، کبھی شام
کہیں جو قامتِ زیبا پہ سج گئی ہے قبا
چمن میں سرو و صنوبر سنور گئے ہیں تمام
بنی بساطِ غزل جب ڈبو لیے دل نے
تمہارے سایہء رخسار و لب میں ساغر و جام
سلام لکھتا ہے شاعر تمہارے حسن کے نام
تمہارے ہات پہ ہے تابشِ حنا جب تک
جہاں میں باقی ہے دلداریء عروسِ سخن
تمہارا حُسن جواں ہے تو مہرباں ہے فلک
تمہارا دم ہے تو دم ساز ہے ہوائے وطن
اگر چہ تنگ ہیں اوقات ، سخت ہیں آلام
تمہاری یاد سے شیریں ہے تلخیء ایام
سلام لکھتا ہے شاعر تمہارے حسن کے نام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: دستِ صبا
ناشر: شفیق بک ڈپو، دہلی
