محسن اسرار

بستر پہ کوئی اُس کی اداکاری تو دیکھے آیا ہو کوئی جیسے بہت دور سے چل کے

تمھیں تو اور بہت کام زندگی کے ہیں وصال کی نہ کرو آرزو ہماری طرح

اُسے بھی ہوش میں رہنے کا خبط ہے محسنؔ وہ توڑ دیتا ہے جام و سبو ہماری طرح

مجھ کو حالات پہ قابو نہیں پانے دیتا دوسرے لمحے ہر اک پل کا گذشتہ ہونا

گم لگتے ہیں تنہائی میں اپنے لب و عارض کیا کہتا ہے آئینے سے چہرہ کسے معلوم

دنیا والوں کے منصوبے میری سمجھ میں آئے نہیں زندہ رہنا سیکھ رہا ہوں اب گھر کی ویرانی سے

ہم نے بھی حسبِ حال تری رائے کی طرح سچ بولنے کا اپنا طریقہ بدل دیا

وحشت نہیں تھی مسئلہ آراستگی کا تھا بالوں کی کانٹ چھانٹ نے چہرہ بدل دیا

خط کا جواب تو نہیں اُس نے دیا مگر کھڑکی پہ جو پڑا تھا وہ پردہ بدل دیا

بہت پچھتائے ہم بیمار ہو کر تماشا بن گیا اچھا نہ ہونا