نقش فریادی ہے کس کی شوخیء تحریر کا
کاغذی ہے پیرہن ہر پیکرِ تصویر کا
کاوکاوِ سخت جانی ہائے تنہائی نہ پوچھ
صبح کرنا شام کا، لانا ہے جوئے شِیر کا
جذبہء بے اختیارِ شوق دیکھا چاہیے
سینہء شمشیر سے باہر ہے، دم شمشیر کا
آگہی، دامِ شنیدن جس قدر، چاہے بچھائے
مدعا عنقا ہے، اپنے عالمِ تقریر کا
شوخیء نیرنگ، صیدِ وحشتِ طائوس ہے
دام، سبزے میں ہے ، پروازِ چمن تسخیر کا
لذتِ ایجادِ ناز، افسونِ عرضِ ذوقِ قتل
نعل، آتش میں ہے تیغِ یار سے، نخچیر کا
خِشت پشتِ دستِ عجز و قالب آغوشِ وداع
پُر ہُوا ہے سیل سے، پیمانہ کس تعمیر کا؟
وحشتِ خوابِ عدم، شورِ تماشا ہے، اسد
جو مژہ جوہر نہیں آئینہء تعبیر کا
بس کہ ہوں، غالب! اسیری میں بھی آتش زیرِ پا
موئے آتش دیدہ ہے، حلقہ مری زنجیر کا
…………………………
دیوانِ غالب کامل
مرتبہ: کالی داس گپتا رضا
