اب سو جاؤ
۔۔۔۔۔۔۔۔۔
کیوں رات کی ریت پہ بکھرے ہوۓ
تاروں کے کنکر چنتی ہو ؟
کیوں سناٹے کی سلوٹ میں
لپٹی آوازیں سنتی ہو ؟
کیوں اپنی پیاسی پلکوں کی جھالر میں
خواب پروتی ہو ؟
کیوں روتی ہو ؟
اب کون تمہاری آنکھوں میں
صدیوں کی نیند انڈیلے گا ؟
اب کون تمھاری چاہت کی
ہریالی میں کھل کھیلے گا ؟
اب کون تمہاری تنہائی کا
ان دیکھا دکھ جھیلے گا ؟
اب ایسا ہے ۔۔۔۔ !
یہ رات مسلط ہے جب تک
یہ شمعیں جب تک جلتی ہیں
یہ زخم جہاں تک چبھتے ہیں
یہ سانسیں جب تک چلتی ہیں
تم اپنی سوچ کے جنگل میں رہ بھٹکو اور پھر کھو جاؤ ۔۔۔!!
اب سو جاؤ ۔۔۔!!
