ایک دن بارش کے ساتھ !!! ۔۔۔ نصیر احمد ناصر

ایک دن بارش کے ساتھ !!!
۔۔۔۔۔۔۔۔۔۔۔۔۔۔۔
بارش، اے بارش!
کتنی اچّھی ہے تُو
کس موسم کی بیٹی ہے تُو
صوتِ غِنا ہے،
ققنس پیدا کرتی ہے، موسیقی ہے تُو
تیرے گیت کی لَے پر
لفظ مِرے رقصیدہ ہیں
جھوم جھوم کے لکھتا ہوں
ہاتھ بڑھا کے بادل کو کھڑکی تک لے آتا ہوں
تجھ کو باتوں میں لگا کر
جھیلیں، دریا اور سمندر نظموں میں بھر لاتا ہوں
آتشدان کے آگے
اولوں کے ڈھیر لگا دیتا ہوں
پانی بن جاتا ہوں
بارش، اے بارش!
کتنی اچّھی ہے تُو
مجھ میں برس کر بھیگ نہ جانا !!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سہ ماہی "کارواں” بہاول پور
جلد: ۴۲
جنوری ۲۰۱۴ء تا دسمبر ۲۰۱۴ء

Related posts

One Thought to “ایک دن بارش کے ساتھ !!! ۔۔۔ نصیر احمد ناصر”

  1. یاسر فاروق

    نظم ‘ایک دن بارش کے ساتھ’ بارش کی طرح دلکش ہے..ہاتھ بڑھا کر بادل کو کھڑکی تک لے آتا ہوں…گویا پانی سے بھرا بادل بڑوں کو بھی بچہ بنا دیتا ہے… فطرت کی گود ہی ایسی ہے…آتشدان کے آگے اولوں کے ڈھیر لگا دیتا ہوں پانی بن جاتا ہوں.. ساون کا یہی تو کمال ہے کہ ٹھنڈے جذبات پگھلے جاتے ہیں…مجھ میں برس کر بھیگ نہ جانا…عمدہ خیال…فسوں انگیز افسانے کے انجام کی مانند… من تو شدم تو من شدی کی چھم چھم

Leave a Comment