خدا کے لیے ایک نظم ۔۔۔۔۔۔۔ ممتاز اطہر

خدا کے لیے ایک نظم
۔۔۔۔۔۔۔۔۔۔۔۔۔۔۔۔

دریچوں میں بجھتے چراغوں کے چہرے
منڈیروں سے لپٹی ہوئی
زرد بیلوں پہ شبنم کے قطرے
تمہارے بہت دیر سے منتظر ہیں

کبھی شاخچوں پر
شگوفوں کی صور ت میں
تم اپنے ہونے کا اظہار کرتے
تو پتوں میں پوشیدہ خوشبو کے پَر پھڑ پھڑاتے
یہاں اِن فضائوں سے مانوس اُجلے پرندے
تمہارے بہت دیر سے منتظر ہیں

کبھی چاند کے رتھ پر بیٹھے ہوئے تم
اِدھر سے گزرتے ،
ہَوا اور شجر تم کو بانہوں میں لیتے
٭’’مہانوں‘‘ کی بستی میں بسرام کرتے
تو دریا کناروں سے باہر
تمہارے چَرن چُھونے آتا
خموشی تمہیں ہجر کے غم سے آگاہ کرتی
اُداسی میں بھیگی ہوئی ریت پر
کشتیاں اور ستارے
تمہارے بہت دیر سے منتظر ہیں
کبھی شب کی کالی گپھا سے ،انا سے ،
نکلنے کی کوشش تو کرتے
۔۔۔۔۔۔۔۔۔۔۔۔۔۔۔۔۔۔۔
٭ ملّاحوں

Related posts

Leave a Comment