لہو میں اضطراب آئے نہ آئے
یہ شب یہ ماہتاب آئے نہ آئے
منا لے جشنِ نیرنگ تمنا
پھر ان آنکھوں میں خواب آئے نہ آئے
یہ بستی کور چشموں کی ہے بستی
انھیں کیا آفتاب آئے نہ آئے
ابھی بے پردہ مت کر حسن اپنا
مری آنکھوں کو تاب آئے نہ آئے
نکل آ گھر سے باہر پھر یہ بارش
دوبارہ بے حساب آئے نہ آئے
غمِ ہجراں سے آنکھیں بجھ گئی ہیں
وہ چہرہ بے نقاب آئے نہ آئے
ہوائے زَر نے دھندلا دی مری روح
اس آئینے پہ آب آئے نہ آئے
شجر تو چھاؤں پھیلاتا رہے گا
کوئی خانہ خراب آئے نہ آئے
نیا انسان خود قہرِ زمیں ہے
فلک سے اب عذاب آئے نہ آئے
تغیر زندگی کے ہم قدم ہے
صدائے انقلاب آئے نہ آئے
پرانی صحبتوں کا دور واپس
سرِ شہرِ خراب آئے نہ آئے
فراتِ خوں قدم چھونے لگی ہے
سو اب خیموں میں آب آئے نہ آئے
کسے معلوم کل شاخِ شجر پر
کوئی تازہ گلاب آئے نہ آئے
کہے جاؤں میں حرفِ دل فراست
ان آنکھوں کا جواب آئے نہ آئے