جہاں بھی ہم چلے جائیں
۔۔۔۔۔۔۔۔۔۔۔۔۔۔۔۔۔۔۔
جہاں بھی ہم چلے جائیں
کوئی دجلہ ،کوئی راوی
وریدوں میں ہماری سانس لیتا ہے
چراغوں سے بھرے بجرے
ہمارے ساتھ بہتے ہیں
کناروں پر بچھے ابرق میں
تاروں کا پڑائو
اور لہو میں خواہشوں کا
اک الائو جاگتا ہے
نئی دنیائوں کا کوئی بہائو جاگتا ہے
جہاں بھی ہم چلے جائیں
کوئی جنگل بدن میں لہلہاتا ہے
کوئی خوشبو نفس میں بھرنے لگتی ہے
ہَوا سرگوشیوں میں ناشناسا نام لیتی
اور کسی بیتے زمانے کی کتھا تحریر کرتی ہے
پرندے اک پرانے شہر کا رستہ بتاتے ہیں
جہاں اک نیلگوں تالاب کی آئینگی میں
جل بجھے خوابوں کے چہرے
جھات کرتے ہیں
زمانے بات کرتے ہیں
جہاں بھی ہم چلے جائیں
انوکھی ان کہی باتوں کی پرچھائیں
ہمارے ساتھ رہتی ہے
سو، اب ہم کو نئی ہجرت نہیں کرنی
